Өмір жайлы...

  Өмір-Өзен. Дүние-Дүрмек. Күйбің-күйбің тіршілік...  Адамзат  баласы  Жаратқан                      иеміздің құдірет күшімен жасаған мақлұқаттарының бірі ғана.Күллі жартылыстың  арасынан Адам атаның ұрпағын  ардақты етіп, Жер ананың  бетіндегі қыбырлаған тіршілік  атаулының «Халифасы»,- билеуші һәм әміршісі етіп қойған. Аз-кем ақылға салып  қарасаңыз, жан-жануар, табиғат, ауа мен су – баршасы  адамзат  баласы үшін  қызмет қылып тұр. Бір сәт,ойлап көріңіз, егер күнделікті сіміріп ішіп жатырған су мен тыныстап жүрген таза ауа болмай қалса қайтер едік? Әлдебір пенделер шіреніп: «Қазір ақшаң болса бәрін де сатып алуға болады», - дейді. Рас, өмір болған соң белгілі бір нәрселер сатылады, болмаса сатып алынады.Тіршілік алыс-беріс, барыс-келіс, сауда-саттық, қарыз-қауғадан тұрады.

Алла Тағала Қасиетті Құран-Кәрімнің «Һұд» сүресінің 5-ші аятында: 

«Жер бетіндегі әр жәндіктің қорегі Аллаға тән. Ол, олардың тұрақты, тұрақсыз орындарын біледі. Барлығы өлшеулі бір кітапта», - дейді. Алла елшісі Мұхаммед Мұстафа (с.ғ.с.):  «Өмірде де, өлімде де шынайы болыңдар», - деп өлмес өсиетін қалдырған екен.

Шынайылық әркім шыға беретін шың емес. Бәлкім, ол шыңдарға ілгеріде өткен пайғамбарлар мен Әзиз-әулиелер шығып, кейінгі біздер «дүние»-деген шұңқырдан шыға алмай жүргендейміз. Бірақ сол қу дүниенің түбіне жеткен кім бар? Кейде ойлаймын, осы сыныптай сырғып өтіп жатырған өмір жайлы білеріміз өте аз секілді. Бәрі де екі қол мен екі аяқты, жұмыр басты пенде. Ешқайсымызға артық мүше берілмеген. Рас,қайбір пенделердің тумысынан ақыл-есі кем,жарым-                        жан, мүгедек болуы әбден мүмкін. Бұдан адам баласы ғибрат алуы тиіс. Және де Жаратушы иеміз қаласа,  «Құрт-құмырсқа, бақа-шаян»  қылып жіберуге құдіреті толық жетер еді. Жалпы, күнделікті «күйбің тірлікте»  қысастық пен іштарлықтан, болмайтын бір бақай есептер мен алдап-арбаулардан арылып, ары таза,абыройы биік, көңілі дархан-дала, пейілі кең, шынайы мүмин-мұсылман кейпінде өмір сүруге әбден болатын секілді. Көріп-біліп жүргендей ешкім арғы дүниеге артық ештеңе де  арқалап  кетпейді. Сонда да бір бітпейтін дау-дамай, айтыс-тартыс, тоңмойын тойымсыздық. Сонда, бұл өмір біздерге тек ішіп-жеу үшін ғана берілді ме? Онда анау, айуандардан айырмамыз қандай?  Артық кетсем, айып етпеңіз, ағайын. Ал, ақихат алмас қылыштай өткір...      

 ...Қазақтың біртуар перзенті, марқасқа Мұқағали Мақатаев атамыздың мына бір «Өмір жайлы...» атты өлеңін оқып көріңіз:                                                                                           

«...Өмір жайлы сұрай берме сен менен,                                                                                Өмірді мен әлі зерттеп көрмеп ем.                                                                                         Өмір жайлы білгің келсе, қартқа бар,                                                                                     Қан майданнан жалғыз ұлы келмеген.                                                                                         Жесір келін, бір нәресте көрмеген,                                                                                      Жетім шалды бала орнына тербеген.                                                                                         Өмір жайлы не түсінем мен деген...                                                                                     Өмір жайлы сұрай берме сен менен.                                                                                          Өмір жайлы білгің келсе қартқа бар,                                                                                            Өміріне кегі кеткен, өлмеген,                                                                                                     Жалған айып тағылғанда көлденең,                                                                                     Ақихаттың аппақ туын бермеген.                                                                                                 Содан сұра, содан сұра өмірді,                                                                                                    Нені көрді, нені сезді, не білді.                                                                                                     Неге ақылды, ақымақтан жеңілді,                                                                                            Біреу жылап, біреу неге көңілді? 

...Өмір туралы не айтарыңыз бар, ардақты ағайын?   

Мақсот Бағытжанов

1-қараша күні Жылыой мұсылмандар орталық мешітінің ұйымдастыруымен  әйел  жамағаттар арасында  «Исламдағы әйел мәртебесі» атты тақырыпта танымдық кеш өтті. Шараға мешіттің бас имамы А.Исаев, Жылыой аудандық қажылар төрайымы Қ. Қосқұлақов, мешіт ұстазы Төлеубай Жаңылған, «Шарға» оқу орталығының директоры А.Мақтаубаевалар қатысты. Жиынның  мақсаты қоғамда әйелдің қадірін түсіндіру, жат ағымнан аулақ болуға шақыру, бала тәрбиесіне жауапкершілікпен қарау сынды өзекті мәселелер.

Шара барысында сөз алған Арман Исаев мұсылман әйелдің артықшылықтарын түсіндіріп, қыз балалардың кішіпейіл, мейірімді, білімді, отансүйгіш, бауырмал т.б. асыл қасиеттерді бойына сіңіре білу қажеттілігін баса айтты. 

Кездесу соңында  викториналық сұрақтар қойылып, дұрыс жауап бергендерге сыйлықтар тарту етілді.

ҚМДБ Атырау өңірі бойынша баспасөз қызметі,

Жылыой орталық мешіті