21-сәуіркүні «Иманғали» орталықмешітінде «Аялы ағаш – саялы ағаш» тақырыбында ағаш отырғызу акциясы өтті.  Шара барысында мешіт айналасын көгалдандыру сынды игі істің бастамашысы ҚМДБ-ның Атырау өңірі бойынша өкілі, «Иманғали» орталық мешітінің бас имамы Батыржан Берденұлы ағаш отырғызудың қоғамдық қажеттілігі, мән-маңызы туралы  аз-кем уағыз-насихат айтты. Өкіл имам өз сөзінде "Адам баласының өмір сүруі үшін ауа қандай қажет болса, таза ауа – салауатты өмір салтының кепілі. Яғни, адам ағзасына қажетті оттегіні бөліп, ауа құрамының тазалығына ықпал ететін ағаш тектес өсімдіктердің пайдасы ұшан-теңіз. Ғалымдардың айтуынша, қаншалық ғылым мен технология дамыса да, әлі күнге ағашқа жететін ауа тазартқыш қондырғыларын ойлап табу мүмкін болмай отырған көрінеді. Бұл – жаратылыс құдіреті. Исламмен біте қайнасқан дана халқымыздың  «Атадан мал қалғанша, тал қалсын» деуінің мәнісі де – осында»,  – деді.

«Иманғали» орталық мешіті ауласында өткізілген ағаш отырғызу шарасына облыстық Дін істері басқармасы Ақпараттық-талдау орталығы, «Жәрдем-Атырау» кооперативтік, «Шапағат» деструктивтік діни ағымдардан жапа шеккендерге көмек орталығы қорларының ұжымдары қатысып, 40-қа жуық тал отырғызылды. 

«Иманғали» орталық

мешітінің баспасөз қызметі

Қаламыздағы көне мешіттің бірі – «Құспан молда» мешітінің тозығы жетіп, сонымен қоса, сыйымдылығының тар болуына байланысты бұзылғаны туралы өткен айларда хабарлаған болатынбыз. Содан бері мешіттің ауласы тазаланып, құрылыстың жүргізілуіне дайындалған еді.

Міне, 21-і сәуір күні көптен күткен Алла үйі құрылысына негіз болып қаланатын мешіттің іргетасы құйылды. ҚМДБ-ы Атырау өңіріндегі өкілі, «Иманғали» орталық мешітінің бас имамы Батыржан Берденұлы бастаған атыраулық жамағат осындай қуанышты күнді атаусыз қалдырмады. Қай істі де Алланың атын атамай қолға алмайтын салтымыз бойынша құрбандыққа мал шалып, өкіл имам оқыған Құраннан кейін Алла тағаладан дұға тіледі. Мешіт салу сынды Алла Тағала құзырындағы қайырлы іс басында тұрған бас имам қуаныштан толқып, «Осындай ашық аспан астында, ел аманда Алла Тағаланың аманаты, пайғамбардың (с.ғ.с.) сүннеті болған дін-Исламды еркін насихаттап, мешіт көтеруді нәсіп еткен Алла Тағалаға сансыз шүкір айтамыз. Лайым амандық болып, Ислам діні қанатын жая бергей!», – деді. 

 Құрбандық рәсімі бітісімен, құрылысшылар іргетас құю ісіне кірісіп, жиылған жамағат садақа асынан дәм ауыз тиді.

Алла Тағала мешіт құрылысының берекелі болуын нәсіп еткей! 

«Иманғали» орталық

мешітінің баспасөз қызметі