Қалалық «Әт-тақуа» мешіті күллі мұсылман қауымы асыға күткен биылғы Рамазан айын ерекше дайындықпен қарсылады.

26-мамыр күні құптан намазынан кейін, яғни тарауих намазының алдында мешіттің бас имамы Өсімхан Аманбайұлы жамағатты Рамазан айымен құттықтап, берекелі айдың қадір-қасиетіне тоқталып өтті.

«Қайталау – оқу анасы» дегендей, он екі айлардың сұлтаны – Рамазан айы жыл сайын оралып тұрса да, оны ерекше ықылас, ниетпен қарсылаудың маңызы зор. Сондықтан Рамазан айы туралы, ораза, тарауих намазына байланысты шариғи үкімдерді еске салу мақсатында  ұйымдастырылған білім сайысына белсене атсалысуға  шақырамын, - деді Ө.Аманбайұлы жиылған жамағатқа.  

Білімді бекіту шарасында жамағатқа 30-ға тарта викториналық сұрақтар қойылды.

 Сұрақтарға дұрыс жауап берген жеңімпаздарды бағалы сыйлықтармен марапаттаған бас имам 30 күн Рамазанда тарауих намазын Мехмет Шакир Ағаһтың жүргізетінін айтып, жамағатты түркиялық қаримен таныстырды.

Сайыс бітісімен мешіт жамағаты бір атаның баласындай құбылаға бет бұрып, тарауих намазын оқыды.

ҚМДБ-ның Атырау өңірі бойынша

баспасөз қызметі,

қалалық «Әт-тақуа» мешіті

27-мамыр күллі мұсылман жұртшылығы асыға күткен Рамазан айының кіруіне байланысты 26-мамыр күні «Иманғали» орталық мешітінде тарауих намазы оқылды.

Тарауих намазына Атырау облысы Дін істері басқармасының басшысы Қайролла Дүйсешұлы арнайы қатысып, құптан намазының алдында жиылған жамағатты Рамазан айымен құттықтады.

Сондай-ақ, ҚМДБ-ы Атырау өңірі бойынша өкілі, «Иманғали» орталық мешітінің бас имамы Батыржан Берденұлы Рамазан айының қадір-қасиеттері туралы кеңірек тоқталды.

– Намаз оқып, ораза тұту, зекет беру – бұл Алланың әмірі. Пайғамбар (с.ғ.с.) сүннетінде олардың орындалу реті, тәртібі түгел көрсетілген. Ендеше, шариғат көрсеткен күндерде ораза ұстауымыз керек. Айлардың сұлтанында тілеген дұға қайтарылмайды. Қолдан келгенше жақсылық жасауда жарысып, Алланың разылығына қауышу – баршамыздың мұсылмандық міндетіміз, – деген өкіл имам  30 парадан тұратын Құранды шетелдік екі қаридың хатым ететінін жеткізді.

Бас имамның айтуынша, өңірімізге Құран хатым түсіру үшін Түркия Республикасынан арнайы шақыртылған Мұстафа Зенжиржи мен «Иманғали» орталық мешітінің ұстазы Хусейн Кая атты түркиялық қарилар бір ай, яғни 30 күн бойы оқылатын тарауих намазын жүргізеді.

«Иманғали» орталық

мешітінің баспасөз қызметі