Бүгін Астанада Бас мүфти Серікбай қажы Ораздың төрағалығымен Қазақстан мұсылмандары діни басқармасының аппарат жиналысы өтті.

Мəжіліске ҚМДБ төрағасының бірінші орынбасары Наурызбай қажы Тағанұлы, наиб мүфти Бауыржан қажы Əбдірашұлы, ҚМДБ Аппарат басшысы Ғылымбек Мəжиев, бөлім меңгерушілері қатысты.

Басқосуда уағыз-насихат жұмыстарын жандандыру, өзекті сұрақтар төңірегінде пəтуалар шығару, университет пен медреселерге шəкірт даярлау, жастар жылы аясында игі іс-шаралар ұйымдастыру, халал стандарттау саласын дамыту, мешіт құжаттарын дер кезінде тиісті мекемелерге тіркеу, т.б. мəселелер талқыланды. Сонымен қатар, 2019 жылдың жұмыс жоспары бекітілді.

Кездесу соңында Бас мүфти бөлім меңгерушілеріне нақты тапсырмалар берді.

Бүгін Астана қаласында "Ақ мешіт" мешітінің ашылу салтанаты өтті. Игі шараға Қазақстан мұсылмандары діни басқармасының төрағасы Серікбай қажы Ораз қатысты.

Салтанатты рəсім қасиетті Құран аятымен ашылды. ҚМДБ төрағасының Бірінші орынбасары, наиб мүфти Наурызбай қажы Тағанұлы алғашқы сөзді Бас мүфтиге ұсынды.

Осыдан кейін Бас мүфти жұма уағызын айтып, жұма намазын жүргізді.

Айта кетейік, "Ақ мешітте" бір мезетте 1200 адам құлшылығын өтей алады. Мешіт жанында медресе салынған.

Бас мүфти бұйрығымен белгілі дін қызметкері Дәурен Мүслімов "Ақ мешіттің" Бас имамы қызметіне тағайындалды.

Бүгін Астана қаласындағы республикалық «Әзірет Сұлтан» мешітінде қос бірдей қуанышты оқиға орын алды. Ашылу салтанатына ҚМДБ төрағасы, Бас мүфти Серікбай қажы Ораздың өзі келіп қатысқан Call Орталықтың іске қосылуы – Елорда жұртшылығы үшін ғана емес, еліміздің барлық тұрғындары үшін сүйінші жайт болғаны сөзсіз. Енді еліміздің кез келген тұрғыны өзін толғандырған діни мәселелер бойынша 33-30-30 нөміріне қоңырау шалып, толыққанды жауап ала алатын болады. Халық сұранысына орай, жауапты мамандар қазақ және орыс тілдерінде сұхбат жүргізетін болмақ.

Астана қаласының бас имамы Наурызбай қажы Тағанұлының бастамасымен іске қосылып отырған Call Орталықтың тәулік бойы үзіліссіз жұмыс жасауы үшін Елорда мешітттерінің 60 діни қызметкері жұмылдырылған. Білікті мамандардан жасақталған топ арнайы кесте бойы кезекшіліктерін атқарып, тәуліктің кез келген уақытында келіп түскен қоңырауға жауап беріп отырады.

Сондай-ақ, бүгіннен бастап Астана қаласындағы 10 мешітте «Діни ақпарат беру орталығы» да келушілерге өз есігін айқара ашып отыр. Халық сұранысын қанағаттандыру мақсатында іске қосылған бұл жоба түрлі түйткілді тақырыптар бойынша (неке, талақ, несие, мұрагерлік, т.б.) кеңес сұраған жандармен көзбе-көз кездесіп, сырт көздерден тыс сұхбаттасуға қолайлы болу үшін қосылып отыр.

Игі жобаның алдағы уақытта халық арасында кеңінен танылып, жемісті еңбек атқара беруіне тілектестігін білдірген Бас мүфти қос Орталыққа арнайы бас сұғып, жұмыс жайымен де танысып шықты. Тіпті, Call Орталыққа қоңырау соғып, кезекші маманның әзірлігін де пысықтап өтті.

Бүгін Астана қаласындағы республикалық «Әзірет Сұлтан» мешітіндегі игі бастамалардың жалғасы ретінде тағы бір оқиға орын алды. Қаржылық ашықтықты қолдау мақсатында бүгін Астана қаласындағы 10 мешітке садақа терминалдары қойылған болатын.

Бас мешітте өткен «Діни ақпарат беру» және Call орталықтың ашылу салтанатына қатысқан ҚМДБ төрағасы, Бас мүфти Серікбай қажы Ораз жаңадан қойылған садақа терминалдарын тексеріп, мешіт есепшотына қайырымдылық қаражатын аударып көрді.

Айта кетейік, аталмыш садақа терминалдары Астана қаласындағы барлық мешіттерге орнатылған.