islam-atyrau.kz/22 ақпан, 2019 жыл

Жастар жылына орай, жастар жамағатының көшпелі отырысы Атыраудағы Қажымұқан Мұңайтпасов атындағы мешітте болып өтті.

Қазақстан мұсылмандары діни басқармасының Атырау облысы бойынша өкілі, орталық "Иманғали" мешітінің Бас имамы Батыржан Мансұровтың бастамасымен қала және аудандағы мешіттерде жастар жамағатының жұмыс сипаты жаңа бағдарда ұйымдастырылып жатқаны белгілі. Жастарды рухани кемелдікке, білімді болуға, ынтымағы ұйысқан елімізде бірлікті сақтауға үндейтін отырыста орталық "Иманғали" мешітінің наиб имамы, ұстаз Ерболат Боханов Салман Аль Фариси сахаба туралы уағыз айтты.  

"Ислам нұрына шомған бұл адам туралы Пайғамбарымыз Мұхаммедтің (с.ғ.с) "Жәннат мына үш кісіні аңсайды: Әли, Аммар ибн Ясир және Салман" деп, оның о дүниедегі дәрежесінің жоғары екенін білдірген" деп нақтылады уағыз соңын ұстаз Ерболат Боханов. Исламды қабылдау жолында қым-қуыт тірлікті бастан өткерген сахабаның өмірі кейінгі мұсылман буынға үлгі болары анық.

Атырау қаласына қарасты Жұлдыз елдімекенінде орналасқан Қажымұқан Мұңайтпасов атындағы мешіттің жастар жамағатының басын біріктірген жиын соңы сұрақ-жауап форматында жалғасты. 

Орталық "Иманғали" мешітінің баспасөз-қызметі. 

   islam-atyrau.kz/22 ақпан, 2019 жыл 

 Үстіміздегі жылдың 21-23 ақпан аралығында Өзбекстанның Бұхара қаласында Исламның ұлы ғұламаларының, имамдарының, Тариқат білгірлерінің, ғылыми ойлар мектебінің негізі қаланған отаны ретінде, ислам мәдениеті зиярат-туризимінің әлемдік ірі орталықтарының бірі ретінде Бұхара, Самарқанд, Хиуа, Шахрисабз секілді тарихи елдімекендердің маңыздылығы мен мүмкіндіктерін танытуға, мемлекеттің туристік мүмкіндіктерін көрсетуге арналған «Зиярат-туризм» тақырыбында І халықаралық форум өтіп жатыр.

  Форумға Индонезия, Малайзия, Египет, Пакістан, Қазақстан, Катар, Кувейт, Сауд Арабиясы, Сингапур, Әзірбайжан, Түркия, Нигерия, Ресей, Үндістан, Германия, АҚШ, Франция, Ұлыбритания, Оңтүстік Африка секілді әлемнің 100-ден аса елінен өкілдер мен туристік компаниялар қатысуда. Қазақстан атынан ҚМДБ-ның төрағасы Бас мүфти Серікбай қажы Ораздың тапсырмасымен ҚМДБ халал өнімдерін стандарттау бөлімінің меңгерушісі Бейбіт Әліпбекұлы Мырзагелдиев қатысуда.
    Туризм – көптеген мемлекеттердің экономикасы мен жаһандану үдерісіне оң ықпал ететін маңызды әлеуметтік һәм саяси құбылыс. Қазіргі таңда әлемдік мәнге ие болып отырған бұл сала тек көркем табиғатпен ғана шектелмей, тарих пен археологиялық қазбалардың, мәдениет пен өркениеттің, ел мен жердің, сәулет пен ескерткіштерді ерекшелеп көрсетудің ұтымды жолдарының бірі саналады.
    Осы тұста Өзбекстан мен Қазақстан сынды тарихы терең өлкелердің ислами зиярат-туризмнің беделді шаңырағына айналуына мүмкіндігі мол. Сол себепті, зиярат-туризмді дамытып, зияраттың діни әдептерін халыққа түсіндіруде, шариғи мәселелерді талқылауда, ислам тарихының ажырамас бөлігі саналатын Орта Азиядағы тарихы өлкелерді күллі мұсылман жұртшылығына паш етуде ұйымдастырылып отырған аталмыш форумның маңызы зор.
Өзбек пен қазақ сан ғасырлардан бері ауылы аралас, қойы қоралас бірге өмір сүріп келе жатқан туыс халықтар. Қазақ халқы "Өзбек өз ағам" десе, бауырларымыз "Юлдашың қозоқ булса, юлдан адашмайсын" яғни, "Біз өзбектер бір туғанымызды, туысымызды алысқа сапарға жіберіп жатсақ "Досың қазақ болсын" деп бата-тілек береміз дейді. Міне, бұл діні бір, түбі бір түркі халқының бауырмалдығының айқын белгісі деп білеміз. Сол себепті, зиярат-туризм бағытындағы ортақ жұмыстар да жанданып, бірлескен игі шаралар жүйелі түрде жүзеге асады деп сенеміз.

Дереккөз: www.muftyat.kz

islam-atyrau.kz/22 ақпан, 2019 жыл

Атырауда белбеу күресінен кіші жасөспірімдер арасында аймақтық турнир өтті. 

Аталған ашық турнирге Қазақстан мұсылмандары діни басқармасының Атырау облысы бойынша өкілі,  орталық "Иманғали" мешітінің Бас имамы Батыржан Мансұров арнайы қатысып, жас спортшыларға күрес Пайғамбарымыз Мұхаммедтің (с.ғ.с) сүннеті екендігі жөнінде уағыз айтты.

"Күрес пайғамбарымыз Мұхаммед (с.ғ.с) сүннеті және ежелден келе жатқан ұлттық спортымыз. Алла адамзатты зор махаббатпен жаратқан. Жанның тазалығымен бірге, тәннің саулығын сақтаудың да маңызы ерекше. Осындай сайыстар ұлттық спортымызды дәріптеумен бірге, жастардың бірлігін арттырады" деп атап өтті ұстаз Батыржан қажы Берденұлы.

Атырау, Ақтөбе, Қызылорда облыстары бойынша балғындардың бағы сыналған байрақты бәсеке барлығы 350 жас спортшының басын қосты.  

Орталық "Иманғали" мешітінің баспасөз-қызметі. 

islam-atyrau.kz/22 ақпан, 2019 жыл

Қазақстан мұсылмандары діни басқармасының Атырау облысы бойынша өкілдігіне қарасты Жастар секторының жетекшісі, орталық "Иманғали" мешітінің бірінші наиб имамы Мұрат Мұстафаев мектеп оқушыларымен кездесті.

Атырау қалалық №20 мектепте шәкірттермен арада өткен кездесуде ұстаз Мұрат Мұстафаев жат ағымдармен күрес тақырыбында насихат жүргізді.

"Ана құрсағынан басталған ұлттық тәрбие балабақша мен мектепте жалғасын тапса, рухы асқақ, Отанын жанындай сүйетін ұлтжанды ұрпақ тәрбиелей алатынымыз анық. Абай атамыз "Балаға мінез үш алуан адамнан жұғады: біріншісі – ата-анасынан, екінші – ұстазынан, үшінші – құрбысынан" деген.  Отбасы мен мектептен тыс "баланың досы кім, қандай ұл немесе қыз?" деген сұрақтардың төңірегінде де ойлануымыз абзал. Себебі, бала осы үшеуінің қайсысын жақсы көрсе, қайсысын қатты сыйласа, соның ықпалында кетеді. Жат ағымдармен күрестің басты тетігі жүректегі иманда және ұлттық тәрбиеде болуы тиіс" деп атап өтті ұстаз Мұрат Мұстафаев. 

Орталық " Иманғали" мешітінің баспасөз-қызметі.