Қазақстан Мұсылмандары Діни Басқармасының Атырау облысы бойынша өкілдігі – орталық «Иманғали» мешіті жанынан шәкірттерге арналған жатақхана жұмысын бастады. Жиырма бес орындық жатақхана жергілікті колледж, университетте білім алып жатқан шәкірттерге арналған.

«Жатақханаға сұраныс жоғары. Десе де, көп балалы, аз қамтылған отбасыдан шыққан жастарға басымдық беріледі. Шәкірттер үш мезгіл тағаммен қамтамасыз етіледі. Ол үшін арнайы аспаз жұмыс істейді. Жатақханада шәкірттер үшін оқу залы да қарастырылған. Яғни, жастардың алаңсыз білім алуына барлық жағдай жасалған. Төлемақы құны да қолжетімді» дейді мүфтияттың Атырау облысы бойынша өкіл имамы Батыржан Мансұров.

Атырау қаласының Балықшы кентінде орналасқан жатақхананың салтанатты ашылу рәсіміне облыс орталығына қарасты барлық мешіт имамдары, жамағат жиналып, ақ дастархан басында игі тілектерін арнады.

Орталық «Иманғали» мешітінің баспасөз-қызметі.

          Атырау қалалық Қажымұқан Мұңайтпасов мешітінде бас имам Н.Сүндетовтың ұйымдастыруымен «Геолог» және «Қайыршақты» ауылдық округінің қарттары үшін арнайы дастархан жайылды.

Емен-жарқын әңгіме құрылған дастарханда ақсақалдар жас буын арасындағы діни тәрбие мәселесін көтерді. «Аптасына немесе айына бір рет үлкендер мен жастардың басын біріктірген дастархан ұйымдастырылса» деген ұсыныс білдірген жамағатқа қасиетті Құран кітаптары үлестірілді.

Атырау қалалық Қажымұқан Мұңайтпасов мешітінің баспасөз қызметі.