20-cәуір күні «Иманғали» орталық мешітінде мешіт жамағаттарына арналған білім сайысы болып өтті. ҚМДБ-ның Атырау өңірі бойынша өкілі, «Иманғали» орталық мешітінің бас имамы Батыржан қажы Берденұлының бастамасымен ұйымдастырылған сайыс мақсаты мешіт жанындағы сауат ашу курстарында білім алып жатқан шәкірттердің білімін жетілдіре түсу, білім алуға деген құлшыныстарын арттыру болды.

Облыстық Жалпы және жастар ісінің жетекшісі Арман Урумбаевтың жетекшілігімен өткен білім бәсекесіне өкіл имам Батыржан Берденұлы, наиб имам Мұрат Мұстафаев пен Арман Урумбаевтар әділқазылық етті.

Дүбірлі додаға облыстық«Иманғали» орталық мешіті, қалалық «Әт-тақуа», «Атырау селолық», «Мәулімберген», «Қажымұқан Мұңайтпасов» мешіттері атынан 5 жамағат тобы қатысып, өзара бақтарын сынады.

 Сайыстың шарты бойынша, әр топ өздеріне адын-ала оқуға тапсырма ретінде берілген түркиялық ғалым Сейфетдин Языджының «Ислам ілімі негіздері» кітабын оқып, сол бойынша қойылған сұрақтарға жауап беруі тиіс.

Сайыс қорытындысы бойынша «Иманғали» орталық мешіті жамағаты жүлделі 1-орынға ие болып, «Атырау селолық» мешіті 2-орынды қанжығаға байлады. Жүлделі 3-орынға табан тіреген "Мәулімберген" мешіті де марапатталушылар қатарынан табылды.

Жеңімпаз топтарға ескерткіш сыйлықтар тарту етілді.       

«Иманғали» орталық мешітінің

баспасөз қызметі

2017 жылғы 17сәуірде Жылыой ауданы, Қара-Арна ауылдық округі «Ырыс» денешынықтыру сауықтыру кешенінде  «Дін мен дәстүр ұлағатты ұғым» тақырыбында жастармен, мекеме қызметкерлері, мектеп оқушылары және ауыл тұрғындарымен кездесу өткізілді.

Мақсаты - діни тұрақтылықты нығайту, сауаттылықты арттыру, экстремизм мен радикализм идеяларын алдын-алу.

Кездесуге «Жәрдем-Атырау» корпоративтік қорының директоры Е.Жаулин,«Шапағат» деструктивтік діни ағымдардан жапа шеккендерге көмек орталығының теологы М.Кульсумаков, Атырау облысы ІІД-нің жергілікті полиция қызметі бастығының орынбасары, подполковник М.Демегенов, Жылыой аудандық маслихатының депутаты С.Балжігітов, облыстық жұмыспен қамту басқармасының бөлім басшысы Д.Әбішева, облыстық кардиолог орталығының кардиолог дәрігері Э.Жумагалиева, Қара-Арна ауылдық округінің әкімі Е.Елесуінов қатысты.

Қара-Арна ауылдық округінің әкімі Е.Елеусінов жиынды ашып, ұйымдастырудағы мақсаты мен маңызына тоқтала кете, баяндамашыларды таныстырып, қатысушыларға осы мүмкіндікті пайдалана отырып көкейдегі толғандырған сауалдарды қоюға шақырды.

«Жәрдем-Атырау» КҚ директоы Е.Жаулин тақырып аясында маңызды мәселелерді атай отырып, жастар арасындағы діни ахуал қай ата-ананы да алаңдататынын ескеріп өтті. Бұл – қоғамдағы түйінді мәселелердің бірі екені де рас. Өйткені, ұл-қыздарын мешітке жіберуден қорқатын болды олар. Десе де, құбылаға қарап тізе бүккен, Жаратушысын таныған кейінгі буынның, ата жолын ұстанған ұрпақтың көбеюі көңіл қуантады. Ал, олардың бағыты қандай, жат пиғылды ағымдардың жетегінде емес пе, неге жаппай діншіл болып кеттік? Осы сауалдардың жауабы туралы біраз ойын ортаға салды.

«Шапағат» орталығының теологы М.Кульсумаков өз кезегінде әр халықтың өзіне тән, қоғамның дамуына байланысты ерекшеліктері болады. Мәселен, еліміздің ұлан-байтақ жерді алып жатуының өзі ғасырлар бойы халқымыздың бойындағы, батырлық пен ерлік дәстүрін тудырған. Қазақ – ұлттық дәстүрге ерекше мән беретін халық. Дәстүр – ұлтты рухани жандандырып, оның ішкі және сыртқы келбетін өрнектеп, көрсетіп тұратын сипаттар. Дін мен дәстүр – қашанда бір-бірімен сабақтас ұғым. Екеуі егіз тақырып десек те болғандай.Дін бар жерде дәстүр, дәстүр бар жерде дін де бар деп айтуға болады. Алла тағала құранда: «Кешірімді бол, ғұрыпқа жақсылыққа бұйыр және надандардан жырақ бол» - деп әмір етеді. Ғұрып дегеніміз бір қоғамда қалыптасқан жағымды әрі қайырлы іс. Демек, Алла тағала жоғарыдағы аяттарда қоғамда жағымды жағдайларды қалыптастырып, оларды негізге алуға әмір етіп тұр, - деп сөзін қорытындылады.

Жиын соңында діни тақырыпта сұрақтар қойылып, өз ойларымен пікір алмасылды. Шараға150адам қатысты.

«Шапағат» орталығы

баспасөз қызметі

ҚМДБ-ы Атырау өңірі бойынша өкілі, «Иманғали» орталық мешітінің бас имамы Батыржан Берденұлы күні кеше, 19-сәуір күні Астана қаласында өткен ІІ Республикалық имамдар форумына қатысып қайтқан еді. Осымен байланысты өкіл имам облыстық «Қазақстан-Атырау» телеарнасының «Иман нұры» бағдарламасында қонақта болып, тікелей эфирде имамдар форумында қабылданған аса маңызды діни құжаттардың алға қойған мақсат-міндеттері туралы сұхбат берді.

          «Биылғы өткен «Ислам және өркениет» атты ІІ Республикалық имамдар форумында халқымыздың сан ғасырлық сенім жүйесінің елдік бедерін айқындауға септігін тигізетін  2-құжаттың көпшілікке жол тартуы – тарихи мәселе. Нақты айтқанда, форум барысында қабылданған 1-құжаттың «Ханафи мәзһабы мен Матуриди сенім мектебі –  Қазақстандағы Исламның дәстүрлі жолы» деп аталуы асыл дініміздің халық тарихымен біте қайнасып жатқанын көрсетеді. Бұл ретте ардақты пайғамбарымыздан (с.ғ.с.) аманат болған Ислам құндылықтарын келер ғасыр ұрпағына жалғайтын имамдарымыздың кісілік, тұлғалық бет-бейнесі, кәсіби білім-өресі қандай болмақ? Осы сұраққа форум барысында қабылданған «ХХІ ғасырдың үздік зияткер имамы» атты 2-құжат толық жауап береді. Бас мүфти Ержан қажы Малғажыұлы атап көрсеткендей, ел мұсылмандарын бірлікке шақырып, халқымыздың дәстүр-салты мен әдет-ғұрыптарын сыйлауға, зайырлылық қағидаттарын ұстануға, жат ағымға қарсы күресте батылдық танытуға үндейтін бұл құжаттардың ел руханиятына зор үлес қосып, қоғам дамуына, ішкі тұрақтылықтың сақталуына серпін беретініне сенімім мол», – деді Батыржан Берденұлы өз сөзінде.

          Өкіл имам тікелей эфир барысында қойылған сұрақтарға жауап беріп, форум құжаттарының стратегиялық бағыт-бағдарын түсіндірді.

«Иманғали» орталық

мешітінің баспасөз қызметі