Аса қамқор, ерекше Мейірімді Алланың атымен бастаймын!

Қадірлі бауырлар!

Баршамызды оразаға аман-есен жеткізген құдіреті шексіз Алла Тағалаға сансыз шүкірлер мен мақтау-мадақтар болсын!  

Сіздерді күллі мұсылман қауымы асыға күткен қасиетті рамазан айының келуімен шын жүректен құттықтаймын! Әр шаңыраққа шаттық пен бақыт, бірлік пен береке тілеймін! Баршаңызға Жаратқан Ием жар болсын!

Біздің халқымыз ежелден рамазанды ерекше қастерлеп: «Он екі айдың сұлтаны», – деп атаған. Берекесі мол айда жарамазан жырын айтып, оразаның келгенін қуанышпен жеткізіп, насихаттаған. Ал ауызашар дастарханы рухани сұхбаттың, бата мен ізгі тілектің қайнары болған. Ауыз бекіткен адамды айрықша қадірлеп, оған ауызашар беру – бағзыдан келе жатқан салт-дәстүріміз бен әдет-ғұрпымыз.

Таңғы сәресі әр шаңырақ үшін қуанышты сәт болса, кешкі ауызашар ағайын мен туысты, бір қауым елді имандылыққа ұйытқан, мерекесі мен берекесі үйлескен басқосу болатын. Аллаға шүкір, бұл игі дәстүр ғасырдан ғасырға жалғасып, жаңғырып келеді.

Осы ретте отандастарымды материалдық көмекке мұқтаж жандарға көңіл бөліп, қайырымдылық іс-шараларға белсенді түрде атсалысуға шақырамын. Кәсіпкерлерді рамазанның құрметі үшін азық-түлік, көкөніс пен тұрмыстық заттарға, жол-көлік ақысына жеңілдіктер жасауға үндейміз.

Құрметті жамағат!

Қазақстан мұсылмандары діни басқармасы «2018 – Ислам және отбасы жылы» деп атады. Қасиетті айда қараусыз қалған қарттар мен мүгедектерге, жетімдер мен көпбалалы отбасыларға, науқас адамдарға барынша қамқорлығымызды көрсетейік, ардақты ағайын! Бір адамды қуанышқа бөлеу – садақа.

Құдайы астар мен садақалар ауызашар уақытында ұйымдастырылса, тойлар ішімдіксіз өткізілсе, жамандықтың бастауы болған арақ-шараптың сатылуына барынша жол берілмесе деген тілегімді білдіремін.

Құрметті қауым!

Он екі айдың сұлтаны – рамазан құтты, берекелі болсын! Қасиетті айда жасайтын құлшылық, дұға-тілектеріңіз қабыл болсын! Алға қойған арман-мақсаттарыңыз орындалып, оразадан оразаға аман-есен жете беруімізді Алла нәсіп етсін! Еліміз аман, жұртымыз тыныш, халқымыздың бірлігі нығайып, берекесі арта бергей! Тәуелсіздігіміз әрқашан баянды болғай! Әумин!

Мұсылман білуі керек мәселелер қандай? Атырау қаласына қарасты Алғабас ауылында орналасқан «Мәулімберген» мешітінің наиб имамы Нариман Ермағамбетов жастар жамағаты арасында осы мәселеге байланысты уағыз айтты.
"Ең жақсы ұстаз кім? — Қайғы. Ең нашар ұстаз кім? — Рахатқа бөлену. Қандай қасиет ең сирек кездеседі? — Бере білу. Қай қасиет ең жақсы? — Кешіре білу. Ең керекті қасиет не? — Тыңдай білу. Қандай адам ең мықты? — Ақиқатты түсінген адам. Қандай адам ең әлсіз? — Өзін мықты санаған адам. Құдайға қандай адам жақын? – Мейірімді. Рухы мықты адам кім? — Өзін-өзі жеңген адам. Жан дертінің белгісі не? — Үмітсіздік. Жаман істің белгісі не? — Ашу. Жақсы істің белгісі не? — Жан тыныштығы". Мұсылман білуі тиіс мәселелер арасында осындай қарапайым сауалдарға қарапайым жауап та бар. Әр мұсылман Құран аяттары мен хадистерден, Пайғамбарымыз Мұхаммед (с.ғ.с), сахабалар өмірінен тағылым алса, ата-анасымен, жарымен, баласымен, қоғаммен көркем қатынаста бола білсе, кемел мұсылман сипатына лайық бола алады" деп атап өтті ұстаз Нариман Ермағамбетов.
Кездесу барысында "Мәулімберген" мешітінің наиб имамы Нариман Ермағамбетов жастардың көкейінде жүрген көп мәселелі сұрақтарға жауабын берді. Жиын соңында жамағаттарға рухани кітаптар сыйға таратылып, үлкендердің батасымен қорытындыланды. «Мәулімберген» мешітінің баспасөз - қызметі.

Қазақстан мұсылмандары діни басқармасының Атырау облысы бойынша өкіл имамы, "Иманғали" орталық мешітінің бас имамы Батыржан Мансұров өңірлік коммуникациялар қызметінде баспасөз-конференциясын өткізді.