іslam-atyrau.kz/17 ақпан, 2020 жыл.  Атырауда жамағат үшін оқыту семинары басталды.

Қазіргі уақытта Атырау қаласындағы орталық «Иманғали» мешітіне қарасты қайырымдылық мекемесінде оқуын бастаған шәкірттер облысты құрап отырған жеті ауданнан және қаладағы мешіттердің жолдамасымен дәріс алуда.

Шәкірттер бір айы бойы тегін білім алады. Олардың жатын орны, тамақтану мәселесі қамтамасыз етілген.

«Шәкірттерге білікті ұстаздар бір ай бойына ақида, фиқһ, сира, тәжуид, жаназа үкімі сынды тақырыптар бойынша дәріс жүргізеді. Және осы аралықта Құран оқуды үйреніп шығуға мүмкіндік бар.  

Біздің басты мақсатымыз – жат идеологияның алдын алу. Дәстүрлі дінімізді дәріптеу. Және кадр мәселесін шешудің жолдарын қарастыру.

Бір айлық курсты аяқтаған мамандарға сертификат беріледі. Ол сертификат арқылы шәкірттер имамдардың екі айлық курсында оқи алады.  Немесе медресеге түсіп, білімін шыңдауға  мүмкіндік бар. Осылайша, біз аймақта діни мамандар резервін қалыптастыруды көздеп отырмыз» дейді Атырау облысының Бас  имамы Алтынбек Ұтысханұлы.

Орталық "Иманғали" мешітінің баспасөз-қызметі. 

   іslam-atyrau.kz/17 ақпан, 2020 жыл. Қазақстан мұсылмандары діни басқармасы Әйелдер-қыздар секторының Атырау облысы бойынша өкілдігінің ұйымдастыруымен орталық «Иманғали» мешітінде жәрмеңке өтті.

Жəрмеңкеге мешіт шəкірттерінен құрылған еріктілер және қызметшілер, барлығы  40-қа жуық адам қатысты. Осылайша, үй жағдайында пісірілген тәтті тоқаш, өзге де кондитерлік өнімдер сатылымға шығарылды.

«Қайырымдылық шарасынан түскен  табыс көлемі  150 мың теңгені құрады. Біз енді жәрмеңкені  ай сайын тұрақты өткізуді жоспарлап отырмыз. Алла қаласа, қаржы мұқтаж адамдардың қажеттілігіне жұмсалады» дейді ұйымдастырушылар.

Орталық "Иманғали" мешітінің баспасөз-қызметі. 

 іslam-atyrau.kz/17 ақпан, 2020 жыл. Исатай ауданының бас имамы Шалқар Дәулетханұлы ауылдарды аралады. Ондағы мақсат жұртшылыққа «Жеті рухани қазық» тұғырнамасын насихаттау.

Исатай ауданына қарасты Томан елдімекені, Қамысқала ауылдық округі, Тұщықұдық ауылдық округі, Аққыстау ауылдық округі, Жанбай, Нарын, Зинеден, Исатай ауылдық округтерінде өткен кездесу осылайша 500-ден астам адамды қамтыды.

«Өткен жылдағы ІІІ республикалық имамдар форумының басты оқиғасы – «Жеті рухани қазық» бағдарламасы болатын. Бұл құжатты тәлім әліппесі десек те болады. Тұғырнама мұсылманнан табылуы тиіс негізгі жеті көркем сипатты қамтиды. Атап айтқанда, имандылық, отаншыл болу, білім алу, бірлікке болысу, еңбекқорлық, мәдениетті болу және әділдік принципін ұстану. Бұл – адам баласының кісілік келбетін, көркем мінезін қалыптастыруға негіз болатын жеті рухани қазық.

Егер, әр мұсылман баласы осы қасиеттерді бойына сіңіруге жұмыстанатын болса, қоғамның рухани дамуында үлкен жетістіктерге жетеріміз анық» дейді Исатай ауданының бас имамы Шалқар Дәулетханұлы.

Ауылдық елдімекендерге іс-сапар Исатай аудандық орталық мешітінде қорытындыланып, жамағатқа «Жеті рухани қазық» тұғырнамасының мән-маңызы туралы уағыз – насихат айтылды.

Орталық "Иманғали" мешітінің баспасөз-қызметі.