Орталық «Иманғали» мешітінде Қазақстан Мұсылмандары Діни Басқармасының Насихат және қоғаммен байланыс бөлімі Атырау облысы бойынша Әйел-қыздар секторының ұйымдастыруымен «Құлшылықтың абзалы» атты дұғалар жарысы болып өтті. 

Осыдан үш ай бұрын мешіт шәкірттеріне күнделікті оқитын дұғаларды, таңғы-кешкі зікірлерді оқып, ұстазға есеп беріп отыру жүктелген болатын. Ондағы мақсат – дұғаларды күнделікті оқи отырып, шәкірттердің тіл жаттықтыруына жол ашу еді. Осылайша, межелі күні дұға жарысына он бес қыз-келіншек қатысты. «Олардың арасында үш балалы аналардан бастап, тұрмыс құрмаған бойжеткендер де болды. Дұға жарысында әр қыз балаға бір-бірін қайталамай, дұға оқып шығу міндеттелді. Оның ішінде, зікір, Құраннан алынған дұғалар, пайғамбарымыз (с.ғ.с) сүннетінен алынған дұғалардың барлығы айтылып шықты. Дұға оқу жарысы сегіз айналымнан тұрды. Нәтижесінде 180-ге жуық дұғалар оқылды» дейді шараны ұйымдастырушы ұстаз Зарина Жукенова. Тартысты бәсекеде үздік шыққандар екінші айналымға өтті. Екінші айналымда шәкірттер уағыз айтудан бақ сынасты. Зікірдің пайдасы, дұға оқу кезінде жазылатын сауап сынды тақырыптар жерибе бойынша таңдалды. Сайыс одан әрі викториналық сұрақтар түріндегі ойындарға ұласты.

Шәкірттердің рухани кемелдене түсуіне жол ашқан шара нәтижесінде дұға оқу жарысынан бірінші дәрежелі дипломмен Жанар Бекенова марапатталды. Марта Нетекова мен Әлия Нұралы екінші және үшінші дәрежелі дипломды өзара бөлісті.

Әйел-қыздар секторының жауапты ұстазы Зарина Жукенованың шәкірттері арасындағы үздік деп танылғандары арнайы мадақтамаға ие болды. Осылайша, «Үлгілі шәкірт» атағын 62 жастағы Айман Маева, 66 жастағы Рысты Джангулатова және 69 жастағы Сара Сугурова иеленді. Астын сызып айтарлығы, бұл шәкірттер тегіннен тегін үздік атанып отырған жоқ. Мәселен, Рысты Джангулатова орталық «Иманғали» мешіті жанындағы курсқа Жылыой ауданының орталығы Құлсары қаласынан келіп оқып жүр. Құран сабағы және Тәджуид сабағын сәтті аяқтаған ол енді Құран оқу кезеңіне аяқ басып отыр. Сара Сунурова апамыз ота жасатып шықса да, денсаулық жағдайына қарамастан, Құран-Кәрімді әдемілеп оқуды өзіне мақсат еткен жан. Айман Маева апамыз да аяғының ауырғанына қарамастан, мешітке алыс шақырымдардан қатынап, үлкен ниетпен сабақ оқып жүр. Және аталған шәкірттердің қай-қайсы да оқуда озат.

Барлық қатысушыларға «Алғыс хат» табысталған рухани сайыс осылайша шәкірттердің білім деңгейін ашық сарапқа салуға мүмкіндік берді.

Орталық «Иманғали» мешітінің баспасөз қызметі.

 

Ислам дінінің Конституциясы болып табылатын қасиетті Құран-Кәрімді өз бетімен жүргізіп оқуға машықтанған шәкірттер арасында «Алтын тәж» атты рухани-танымдық кеш өтті.

 Отыз шәкірт қатысқан танымдық кешті Қазақстан Мұсылмандары Діни Басқармасының Насихат және қоғаммен байланыс бөлімі Атырау облысы бойынша  Әйел-қыздар секторының ұстазы Айжарқын Тузелова ұйымдастырды. Кеш барысында шәкірттер бір-бірімен Құран оқудағы білген-түйгенімен, тәжірибесімен бөлісті. Одан әрі уағыз-насихатқа ұласқан кеш соңында шәкірттер құрметіне дастархан жайылды.

Басты жаңалық сол – өз білімімен өзгеге үлгі болған шәкірттерге танымдық кеш барысында қасиетті Құран кітабы сыйға табысталды.

Орталық «Иманғали» мешітінің баспасөз-қызметі.

«Жаны саудың – тәні сау». Осындай атаумен Қазақстан Мұсылмандары Діни Басқармасының Насихат және қоғаммен байланыс бөлімі Атырау облысы бойынша  Әйел-қыздар секторының ұйымдастыруымен қыз-келіншектер арасында спорттық шара болып өтті.

Салауатты өмір салтын насихаттау мақсатында өткен сайыс алдымен Алланың нығметтері туралы уағызбен басталды. Кейін қатысушылар эстафета, волейбол ойындары бойынша өзара бақ сынасты.

Басты ерекшелік сол, спорттық сайыс қыз-келіншектер мектебі арасында тұңғыш рет ұйымдастырылып отыр. «Шәкірттеріміз тарапынан қолдау тапқан спорттық шараларды енді ай сайын тұрақты түрде өткізуді жоспарлап отырмыз. Қазақта «Тәні саудың – жаны сау» деген керемет мақал бар. Біздің мақсатымыз – салауатты өмір сүру салтын насихаттау арқылы, спортқа бейімі бар қыз-келіншектерімізге қолдау көрсету болып табылады» дейді  сектордың жауапты ұстазы Зарина Жукенова.

Орталық «Иманғали» мешітінің баспасөз-қызметі.

Қазақстан Мұсылмандары Діни Басқармасының Насихат және қоғаммен байланыс бөлімі Атырау облысы бойынша  Әйел-қыздар секторы ұстаздары орталық «Иманғали» мешітінде бас қосты.

Мәжіліс барысында сектордың жылдық жоспары талқыланып, нақты тапсырмалар берілді. Жиналысқа Мақат, Исатай, Құрманғазы аудандарында қызмет етіп отырған ұстаздар да қатысты.

 Асыл дінімізді бұқара арасында кеңінен насихаттау, халық-ағарту жұмыстарына белсене қатысу мәселелері талқыланған жұмыста Әйел-қыздар секторының жауапты ұстазы Зарина Жукенова әріптестерін сауабы мол жұмыста бірлесіп нәтижелі еңбек етуге шақырды.

Орталық «Иманғали» мешітінің баспасөз-қызметі.

Орталық «Иманғали» мешітінде «Алланың махаббатына лайықтылар» атты рухани-танымдық кеш өтті. Қазақстан Мұсылмандары Діни Басқармасының Насихат және қоғаммен байланыс бөлімі Атырау облысы бойынша  Әйел-қыздар секторының жауапты ұстазы Зарина Жукенованың ұйымдастыруымен өткен шарада пайғамбарымыздың (с.ғ.с) сүннеті бойынша шәкірттерге берілген тапсымалар қорытындыланды.

Талап бойынша,  екі шәкіртті бір-бірімен жақынырақ таныстырып, араларындағы достық, бауырмашылдық қасиетті одан әрі арттыру көзделген болатын. Тапсырма негізінде белсенділік танытқан шәкірттерге сыйлық ретінде кітаптар үлестірілді. Шара барысында қатысушылар мектепке жаңадан қадам басқан шәкірттерге де  сәттілік тіледі.

Одан әрі рухани кеш  уағыз-насихатқа, түрлі танымдық ойындарға жалғасты. Исламның ең басты шарты - рухани тазалық пен адамдар арасындағы бауырластық қарым-қатынасты арттыру десек, осынау ізгілікке бастайтын танымдық кешке мешіттің елуге жуық шәкірті қатынасты.

Орталық «Иманғали» мешітінің баспасөз-қызметі. 

Қазақстан Мұсылмандары Діни Басқармасының Атырау облысы бойынша өкіл имамы Батыржан Мансұров мүфтияттың Насихат және қоғаммен байланыс бөлімі Атырау облысы бойынша  Әйел-қыздар секторымен біріге отырып, нәзік жандылар жамағатына айлық уағыз-насихат жүргізді.

«Құрандағы жүрек тәлімі» тақырыбымен жүргізілген насихат барысында өкіл имам шынайы мұсылманның сипаттары, жүрек тазалығы, рухани кемелдік, бақытты отбасын құрудағы әйелдің ролі, иманды ұрпақ тәрбиелеудегі ананың миссиясы мәселелері төңірегінде салиқалы сұхбат құрды. Елуге жуық шәкірт қатысқан рухани диалогты мүфтияттың Атырау облысы бойынша Әйел-қыздар секторының жауапты ұстазы Зарина Жукенова ұйымдастырды.

Орталық «Иманғали» мешітінің баспасөз-қызметі.