Мұнайлы өлкеге жұмыс сапары барысында Ақтөбе  қаласы «Аңсар» ақпараттық талдау орталығының теолог маманы Төлеген Талдыбаев орталық «Иманғали» мешітінің  жамағатымен кездесті. Жүздесу барысында мейман шариғат ілімінің ғалымы атанған  Абдулла ибн Масғудтың өмірі туралы уағыз жүргізді.

«Абдулла ибн Масғуд — ислам дінін жастай қабылдаған жан. Ол Мұхаммед пайғамбарымыздың (с.ғ.с) ең жақын сахабаларының бірі болып, тіпті халық арасында «Пайғамбар сырларының сақтаушысы» атанған.Алғашқы мұсылмандар арасында ол Құран білгірі ретінде танылған. Ал, Мұхаммед пайғамбарымыз (с.ғ.с) «Ибн Масғудтың айтқандарын бұлжытпай орындаңдар»  деп өсиет еткен.

Абдулла ибн Масғуд Куфа қаласында қазы міндетін атқарды және шариғат жөнінде білім беретін орталық құрған сахабалардың бірі болды. Кейіннен осы орталықты өзі басқарды.Ибн Масғудтан кейін бұл орталықты оның шәкірті — Әлқама ибн Кайс басқарды» деген теолог маман Төлеген Талдыбаев, сахаба Абдулла ибн Масғудтың ілім, ғылымға деген құштарлығын кейінгілерге үлгі етті.

Исламдық деректерде Абдулла Ибн Масғудтың ғылымға бейім екенін байқаған Хазірет Пайғамбарымыз (с.ғ.с) «Сен тәлімгер болатын жігіт екенсің» деп, оны үлгі еткендігі айтылады. Сахаба Абдулла Ибн Масғудтың ғылымдағы мәртебесі баяндалған еңбектерденоның «Құран», «Хадис» және «Фиқһ» салаларында үлкен дәрежеге ие екендігін де байқауға болады. Сахабалар өмір сүрген бұл кезеңде ғылым атаулының барлығы осы үш ғылыми салада жинақталған болатын.

Орталық «Иманғали» мешітінің баспасөз-қызметі.

Атырау қаласына қарасты Тасқала ауылында орналасқан «Мәулімберген» мешітінде теолог Төлеген Талдыбаевпен кездесу өтті.

Ақтөбе  қаласы «Аңсар» ақпараттық талдау орталығының теолог маманы Төлеген Талдыбаев кездесу кезінде жамағат бірлігі тақырыбында уағыз-насихат жүргізді.

«Қазіргі таңда ислам дінінде жамағаттар көп. Бірақ, Алла Елшісінің (с.ғ.с) айтып өткен «Жаннатта болатын бір топ, ол – жамағат» дегені қайсысы? Бәрі де жамағат бола беретін болса, Алла Елшісі (с.ғ.с) «Сендерге жамағатпен бір болу міндетті, бөлінушіліктен сақтаныңдар, расында шайтан жалғыздың жанында болады, ол екеуден алыс тұрады, ал кімде-кім жаннаттың ләззатын сезінгісі келсе, ол жамағатпен болсын» деп ескерткен жамағаты қайда қалды?» деген теолог Төлеген  Талдыбаев жамағат деп бас-басына би болған, арам ниетті, билікті көксеп, мұсылмандардың тыныштығын бұзып жүрген адамдарды емес, керісінше Алла Елшісінің (с.ғ.с) соңынан ергендерді және де солардан қалған мирасты, ақиқатты жалғап келген көпшілікті атайтынын айтты.

Демек, жамағат дегеніміздің өзі – ынтымақ, ақиқатты сақтап келе жатқан көптің бірлігі. «Олай болса, баршамыз сол көпшілікпен болып, бүлікшілерден аулақ тұрайық. Жарылқаушы Иеміз баршамызға сол жәннатқа лайық болатын жамағаттың қатарында болуды нәсіп етсін» деп түйіндеді сұхбатты теолог- маман  Төлеген Талдыбаев.

«Мәулімберген» мешітінің баспасөз-қызметі.