Қазақстан мұсылмандары діни басқармасының Атырау облысы бойынша өкілі, мүфтият жанындағы Ғұламалар кеңесінің мүшесі Батыржан Мансұров «Қазақстан – Атырау» жергілікті телеарнасында қонақта болды.

Бірнеше жылдан бері көрерменге тікелей эфирде көрсетіліп келе жатқан «Иман нұры» бағдарламасына бас спикер ретінде шақырылған Атырау облысының Бас имамы Батыржан Мансұров «дін және қауіпсіз әлем» тақырыбында сұхбат өрбітті.

«Расында, дін дегеніміз – жеңілдік. Діннен асып түсем деп тыраштанған адам бәрібір түбінде діннен жеңіліс табады. Ендеше, әр істе тура һәм орта жолды ұстаныңдар. Әр істі мейлінше кемеліне жеткізіп орындауға тырысыңдар. Міне, сонда қуана беріңдер…». Бұл – ақырғы Елші Мұхаммед Пайғамбардың (с.ғ.с) сөзі, ислам дінін қиындатуға, құлшылық мәселесінде шамадан тыс тыраштануға, әсірелікке бой алдыруға  болмайтынын меңзеп тұр емес пе?! Мұндай жағдай орын алғанда адамды діннен бездірері сөзсіз. Олай болса, исламда ізгілік жасау, қамқорлық, мейірімділік үстемірек. Ислам – бейбітшілік пен мейірімділік діні. Және ислам - ұлттар мен ұлыстарды біріктіріп отырған әлемдік дін» деп атап өтті Бас имам Батыржан қажы Берденұлы.

Орталық «Иманғали» мешітінің баспасөз-қызметі.

«Жылыой мұсылмандар» орталық мешітінде мешіт ұжымы және жастар жамағатының ұйымдастыруымен Құптан намазынан кейін жамағаттарға арналып дастархан жайылды.

Жамағатқа арналған дастархан басында Жылыой аудандық орталық мешітінің Бас имамы А. Исаев ауызбірлік, ынтымақ тақырыбында уағыз айтты. Мешіт ұстазы Д. Сүлейменов  жамағатпен бірге болу және Алла Тағаланы жамағатпен ұлықтау хақында ой бөлісті.

«Пайғамбарымыз (с.ғ.с): «Кім білім іздеп бір жолға түссе, Алла оның жәннатқа барар жолын жеңілдетеді. Ал, адамдар Алланың Кітабын бәрі бірге қосылып оқып-үйрену үшін Алланың үйлерінің біріне жиналса, оларға міндетті түрде тыныштық түседі (яғни адамның жан дүниесін, жүрегіне тыныштандыратын нәрсе) және оларды мейірім шапағат орап алады, оларды періштелер қоршайды және Алла оларды Өзінің құзырындағыларға айтып мақтанады, ал кімнің амалдары бояу болса, оны шыққан тегі жылдамдата алмайды» деді. Яғни, Алланы жамағатпен бірлесе ұлықтау - күналарымызды кешіріп, дәрежелерімізді жоғарылатын амалдардың бірі» деп атап өтті ұстаз Д. Сүлейменов.

Жылыой аудандық орталық мешітінің баспасөз - қызметі.

18 қазан – «Рухани келісім күніне» орай, бүгін Атыраудағы «Құрманғазы» мәдениет үйінде салтанатты шара өтті. Облыстық әкімдіктің басқарма басшылары, Қазақстан мұсылмандары діни басқармасының Атырау облысы бойынша өкілдігі, діни бірлестіктер, облыстық ақпараттық-насихаттық топ мүшелері, сала ардагерлері және жастар қатысқан шара барысында қоғамдық тұрақтылықты нығайтуға, елдегі діни, рухани келісімді сақтауға қосқан үлесі үшін бір топ сала мамандары марапатталды.