Атырау облыстық орталық "Иманғали" мешіті жанынан жұмыс істеп жатқан екі айлық жазғы сауат ашу курсынан тәлім алып жүрген шәкірттер аралық сынақ тапсырды.

            Түрлі жастағы қыз балалардан құралған шәкірттер тобына ұстаздар "Сира", "Ғибадат", "Сенім", "Дұға жаттау", "Ахлақ" бойынша сабақтар өткізуде. Осы ретте аталған сынақтың шәкірттердің ілімді игеру деңгейін барлауға мүмкіндік бергенін атап өткен жөн. "Фирдаус" және "Ясин" топтарына бөлінген шәкірттер түрлі сауалдарға ұйымшылдықпен, ыждағаттылықпен жауап берді.

            Сынақ барысында шәкірттер "Ең алғашқы аят қандай?", "Ең алғашқы сүре қандай?", "Ең көркем мінезді кім?" деген сынды көптеген сауалдарға Құранда келтірілген дәлелдер бойынша жауап беріп, еркін форматта пікір алмасты. Сондай ақ, шәкірттерге ұстаздар қасиетті Құрандағы "Фил" оқиғасы бойынша кеңінен түсінік беріп, ислам тарихындағы ғибрат аларлық оқиғалармен бөлісті.

            Орталық "Иманғали" мешітінің баспасөз- қызметі. 

Бұған дейін Атырау облыстық орталық «Иманғали» мешітінде «Иманды балдырған» жазғы сауат ашу курсы жұмысын бастағанын хабарлаған болатынбыз.

5 – 10 және 10 – 15 жас аралығындағы шәкірттер білім алып жатқан топтардағы қыз балалар жамағаты жақында елімізге белгілі «Сақ» киностудиясы түсірген мульфильмдерді тамашалады.

Бірінші мультфильмде қасиетті Құранда келтірілетін «Фил» сүресі баяндалады. «Фил» сүресі Меккеде түскен. Мультфильмде «Фил» сүресінде келтірілген піл иелерінің қиссасы баян етіледі. Олар Қағбаны бұзуға бет алады. Бірақ, Алла Тағала оларды өз қаруымен жойып жіберді. Абраһаның әскері ең әлсіз мақлұқтар арқылы жермен жексен болып жойылды. Ол құстар тұмсығы мен аяғына кішкене отты тас алып келеді. Алайда, ғажабы сол, бұл тастар қорғасын оқтан да опатты боп тиді. Ислам тарихшылары аталған тарихи оқиғаның пайғамбарымыз Мұхаммед ибн Абдулла (с.ғ.с) дүниеге келген 570 жылы болғанын айтады.

 «Сақ» киностудиясы түсірген екінші мультфильм «Ниет» деп аталады. Мультфильмнің авторы – Нұр Мүбәрак египет – ислам мәдениеті университетінің PhD доктор Мұхиддин Исаұлы. «Ештеңе тіпті, бір түйір тозаң жоқ кезде Алла Тағала бар еді. Оның бар болуының басталуы болмағанды. Ол әуелден бар. Өзі бар болғандықтан, болмысындағы ұлық сипаттар мен көркем есімдері де барлықта болды. Ештеңеге мұқтажы жоқ, өзінен өзі болатын дара жалғыз болмыс еді. Онда, дүние жаратылмағандықтан кеңістік те, уақыт та, заман да болмаған. Олай болса, Ол бұл дүниені неге жаратты? Алла Тағала өзінің сан қырлы ғажайып құпия сырларын, өзі жаратқан саналы жаратылысына танытқысы келді. Сөйтіп, Алла Тағаланың Ұлы жаратушылық құдіретімен «бол!» деп, әмір етті. Әуелі үлкен жарылыс болды. Дүние жоқтан пайда болды. Әуелі жеті қат көктер, шексіз ғарыш жаралды. Осы шексіз дүниені адам түсінігі бойынша он сегіз мың ғалам деп атады» деп, ата мен баланың арасындағы әңгімеден басталатын мультфильмде намазды оқып үйрену, ниет, бауырмашылдық хақында баяндалады.

Айта кетелік, шараны Қазақстан мұсылмандары діни басқармасы «Әйел-қыздар» секторының Атырау өкілдігі ұйымдастырды.

Орталық «Иманғали» мешітінің баспасөз-қызметі.