«Қапан қажы» мешітінде «Әйел-қыздар» мектебінің басқосу жиыны өтті

Жылыой аудандық орталық  мешітінің бас имамы А.Исаевтың қолдауымен құрылған аудандық «Әйел-қыздар» мектебінің ұйымдастыруымен дөңгелек үстел өтті. Әйел жамағатымен жұмыс жасап келе жатқан сектор «Әжелер кеңесін» құрып, мектеп жұмысын жандандыру, сондай-ақ, ҚР Қажылар қауымдастығы Құлсары филиалының төрайымымен кездесу ұйымдастыру, жастарға өнеге болу мақсатында жұма сайын дөңгелек үстел ұйымдастыруды қолға алып еді.

Осы орайда сәуір айына жоспарланған кезекті дөңгелек үстел "Туысқандық қарым- қатынас" тақырыбында өтті.  Шара соңында аналарымыз дөңгелек үстел тыңдармандарымен еркін пікір алмасып, отбасы берекесін сақтаудағы әйел адамның жауапкершілігін баса көрсетті.

 ҚМДБ-ның Атырау өңірі бойынша

баспасөз қызметі, "Қапан қажы" мешіті

5-мамыр күні қасиетті жұма намазынан кейін мешіт ақсақалдары жұма шайында бас қосты. Мешіт жамағаттарынан тұратын қариялардың кезекті басқосуын ҚМДБ-ның Атырау өңірі бойынша өкілі, «Иманғали» орталық мешітінің бас имамы Батыржан Берденұлы ашып, ел мен елдің басын қосып, ағайын мен ағайынның бауырмалдық, татулық, достығын арттыратын бірлік тақырыбында сөз сөйледі.

Байырғы қазақ салты бойынша қалса, отбасы-әулетінің,асса күллі алаш жұртының басын қосып, бірлігіне ұйытқы болған да – ер-азаматтар. «Себебі, Алла Тағала ер адамның міндетіне Отбасы – Отанын қорғау жауапкершілігін жүктеген. Қария болған шағында қария елдің қазынасына айналады. Ендеше, бірлікті сақтауда қариялардың тағылым-өнегесі зор», – деп өкіл имам ақсақал қариялардың бірліктің ұйытқысы болудағы аталық міндеттерін атап өтті.

 «Иманғали» орталық мешітінің

  баспасөз қызметі

Бүгін, 5-мамыр күні «Нұрсая» спорт кешенінде ҚМДБ-ы төрағасы, Бас мүфти Ержан қажы Малғажыұлы хазіреттің жүлдесі үшін қазақша күрестен облыстық іріктеу турнирі өтті. Турнирді ҚМДБ-ның мұнайлы өңірдегі өкілі, «Иманғали» орталық мешітінің бас имамы Батыржан Берденұлы ашып, ата салтымызбен ұштасқан асыл дініміздегі спортпен айналысып, денсаулықты сақтаудың маңыздылығына тоқталды. «Денсаулық – аманат. Алла Тағаланың адамзатқа берген саулық сынды зор нығметіне қиянат жасамай, аман сақтау – адам баласы үшін ұлық міндет. Елдің түкпір-түкпірінде спортпен айналысып жүрген спорт саңлақтары үшін республикалық сайыс ұйымдастыруды қолға алып отырған Бас мүфтидің бастамасының мәні де осында – салауатты өмір салтын насихаттау, өскелең ұрпаққа жақсылықты үлгі ету», – деді бас имам сайысқа қатысушыларға сәттілік тілеп.

 Баппен қоса бақ та шабатын байрақты бӘсекеге 21 палуан қатысып, 20-ы мамыр күні Астанада өтетін республикалық турнир жолдамасы үшін өзара тартысқа түсті.

 Сайыс қорытындысы бойынша жүлделі 1-орын қызылқоғалық Өтеуов Наурызбектің еншісіне бұйырды. Ал, жүлделі 2-ші орын мәресінен тағы да қызылқоғалық Төлеуішов Мәлік көрінсе, жылыойлық Қоңқақов Береке 3-ші орынға ие болып, республикалық турнирге жолдама алды.

 Жеңімпаздарға баға сыйлықтар табыс етіліп, арнайы сертификаттармен марапатталды.

 «Иманғали» орталық мешітінің

 баспасөз қызметі