25-маусым күні Атырау селолық мешітінде  Ораза Айт мейрамына орай қаладағы балалар үйінде тәрбиеленіп жатқан жетім, жартылай жетім, ата-ана қамқорлығынсыз қалған балаларға құрмет ретінде дастархан жайылды. Дастархан шығынын қайырымқол жамағат көтеріп, қамкөңіл балаларды сыйлықтармен қуантты.

Дастархан басында мешіт имамы Санат Ускенбаев сөз сөйлеп, балалар елдің болашағы екенін айтты. Жылы лебізімен ананың аялы алақаны, әкенің ыстық құшағына сусап жүрген балалардың маңдайынан сипады. Бауырына тартып, қамқор пейілін танытты.

 
ҚМДБ-ның Атырау өңірі
бойынша баспасөз қызметі,
Атырау селолық мешіті

7-маусым күні қасиетті Ораза Айт мерекесіне орай қалалық «Әт-тақуа» мешітінде қайырымдылық жасалды.

Әлеуметтік жағдайы аз қамтылған, мүмкіндігі шектеулі мүгедек жандар мен асыраушысы жоқ көп балалы аналарға, жетімдерге көмек қолын созуды мақсат еткен қайырымдылық шарасын мешіттің бас имамы Өсімхан Аманбайұлы ашып, қайырымдылыққа мұқтаж жандарды татулық пен достық мерекесі – Айт мерекесімен құттықтады. Және «осынау айт мерекесіне орай ұйымдастырылып отырған қайырымдылық шарасының мақсаты да – осы, сіздердің көңілдеріңізге қуаныш сыйлау. Біздің дініміз Ислам – бауырмалдық пен кішіпейілділікке үндейтін дін. Сондықтан шын ниетпен өздеріңізге тарту етілгелі отырған сыйымызды қабыл алыңыздар», – деді. Шара барысында наиб имам Болат Абдулкарим қайырымдылық пакеттерін үлестіріп, көмек сұрай келген ағайынның алғысына бөленді.

Қайырымдылық шарасы аясында 20-ға тарта отбасыға қайырымдылық  пакеттері таратылды.

ҚМДБ-ның Атырау

облысы бойынша баспасөз қызметі,

қалалық «Әт-Тақуа» мешіті

27-маусым күні Геолог мөлтекауданындағы футбол алаңында мешіт жамағаттары арасында футболдан жолдастық кездесу өтті. Сайысқа ҚМДБ-ы Атырау облысы бойынша өкілі, «Иманғали» орталық мешітінің бас имамы Батыржан Берденұлы қатысып, «Иманғали мешіті» командасында өнер көрсетті.

Сайыс қорытындысы бойынша «Құспан молда мешіті» командасы  жүлделі 1-орынға ие болды. «Иманғали мешіті» жүлделі 2-орынды иеленсе, «З.Құрасұлы мешіті» 3-орын биігінен көрінді.

Жеңімпаз командаларға сайыс кубогы мен қасиетті Құран сынды бағалы кітаптар табыс етіліп, «Алғыс хаттармен» марапатталды.

              "Иманғали" орталық мешітінің

                    баспасөз қызметі

Қасиетті Ораза Айт мейрамына орай «Иманғали» орталық мешітінің ұжымы ҚМДБ-ы Атырау өңіріндегі өкілі, бас имам Батыржан Берденұлының бастамасымен табиғат аясына демалысқа шықты.

          "Бесікті" демалыс орнында өткен табиғат аясында Исламдағы достық пен бауырмалдық тақырыбында уағыз-насихат айтылып, викториналық сұрақтар қойылған білім сайысы өтті. Жасыл желек жамылған табиғат аясындағы демалыс  спорттық ойындарға ұласып, әйелдер жамағаты ұлттық ас мәзірлерін дайындады.

«Иманғали» орталық

мешітінің баспасөз қызметі

Қасиетті Ораза Айт мейрамына орай «Иманғали» орталық мешітінің  жастар ұжымы ҚМДБ-ы Атырау өңіріндегі өкілі, бас имам Батыржан Берденұлының бастамасымен табиғат аясына демалысқа шықты.

          "Баклан" демалыс орнында өткен демалыс барысында викториналық сұрақтар қойылған білім сайысы өтіп, мешіт ұстазы Бегалиев Еламан уағыз айтты. Сондай-ақ жасыл желек жамылған табиғат аясындағы демалыс  спорттық ойындарға ұласты.

«Иманғали» орталық

мешітінің баспасөз қызметі