Бүгін «Иманғали» орталық мешітінде әлеуметтік жағынан аз қамтылған он жеті отбасының әрқайсысына 15 мың теңгеден қаржылай көмек көрсетілді.

Қайырымдылық шарасын Қазақстан Мұсылмандары Діни Басқармасының Атырау облысы бойынша өкілі, орталық «Иманғали» мешітінің бас имамы Батыржан Мансұров ұйымдастырды. Және де ол әр мұсылманды қайырымдылық, ізгілік, адамгершілік сынды игі қасиеттердің көркемдеп тұратынын айтты.

Алла үйі қашан да мұқтаж жандарға қолдау білдіріп келеді. Бір ғана Рамазан айында 300-ге жуық отбасыға азық-түлік пакеттері табыс етілді. Қасиетті ораза кезінде 45 отбасыға қаржылай көмек берілді. Осындай игілікті істердің қамкөңіл жандарға демеу болатыны қуантады.

«Иманғали» орталық мешітінің баспасөз-қызметі. 

 «Мектепке жол» акциясы аясында бүгін 140 отбасының балаларына оқуға қажетті құрал-жабдықтар салынған сөмкелер тапсырылды. «Иманғали» орталық мешітінде өткен қайырымдылық шарасында жалғыз басты, аз қамтылған, көп балалы отбасылар қамтылды.

Мұқтаж жандарға жан жылуын сыйлаған Қазақстан Мұсылмандары Діни Басқармасының Атырау облысы бойынша өкілі, орталық «Иманғали» мешітінің бас имамы Батыржан Мансұров ізгі іске жамағаттың тікелей ықпал етіп отырғандығын айтты.

 «Басқаға қол ұшын созуды, материалдық көмек көрсетуді біреулер шығын, желге ұшқан қаражат деп ойлауы да мүмкін. Әсте олай емес. Жаратушы Иеміздің тарапынан әрбір жұмсалған жәрдемнің қайтарымы болатыны жайында айтқан уәдесін ұмытпауымыз керек. Қасиетті Құрандағы: «Жақсылықтың сыйы тек жақсылық қана емес пе?» («Рахман» сүресі 60-аят) деген сөздер осыны меңзейді» деген бас имам Батыржан Мансұров, Алла ризалығы үшін жақсылық жасаудың сауабы мол екендігін айтты.

«Иманғали» орталық мешітінің баспасөз-қызметі. 

Бүгін Атырау облысының бас имамы Батыржан Мансұров орталық «Иманғали» мешітінде қасапшылармен кездесті. Қасиетті Құрбан айт қарсаңындағы кездесуде Батыржан қажы Берденұлы құрбан малын сою талаптары туралы әңгімеледі.

Мәселен, құрбандық айт намазы оқылып біткеннен кейін іске асуы қажет. Сонда ғана ол құрбандық болып саналады. «Құрбан ретінде шалынатын малды қинамау үшін, өткір пышақ қолдану керек. Малды сою үшін жерге жатқызғаннан кейін, пышақты көз алдында жалақтатып, қайрау – әдепсіз амал. Ал, қинамай сою – сүннет. Құрбан шалғанда «Аллаһу әкбар, Аллаһу әкбар лә илаһа иллаллаһу, Аллаһу әкбар, Аллаһу әкбар уа лиллаһил-хамд» деп тәкбір айтылып, жануар «Бисмиллаһи, Аллаһу әкбар» деген сөздерден кейін бауыздалады» деп атап өтті бас имам.

 Батыржан қажы Берденұлының айтуынша, абзалы, құрбан малды иесінің өзі бауыздағаны дұрыс. Басқаға өкілеттігін тапсырып сойғызуға да болады. Ондайда иесінің құрбан малының жанында тұрғаны жөн. Құрбандыққа шалынған малдың етін үш бөлікке бөліп тарату – мұстахап, яғни сауап амал болып табылады.

Айта кеткен жөн, құрбандыққа қой, ешкі, сиыр және түйе малдарын ғана шалуға болады. Құрбан ретінде шалынатын қой және ешкі кем дегенде бір жасар, сиыр екі жасар, түйе бес жасар болуы шарт.

«Иманғали» орталық мешітінің баспасөз-қызметі. 

Қашанда ізгі істердің басы-қасында жүретін "Иманғали" орталық мешітінде тағы да қайырымдылық акциялары өтті. "Мектепке жол" , "Қайырымды бол" акциялары аясында әлеуметтік жағынан аз қамтылған отбасыларға бір жолғы көмек көрсетілді. Азық-түлік пакеті мен оқу құралдары жиынтығын қамкөңіл жандарға "Иманғали" орталық мешітінің ұстазы, əйелдер-қыздар секторының міндетін атқарушы Бибінұр Кармысқызы тапсырды.
Айта кетелік, қайырымдылық акциялары аясында бес отбасы азықпен, он сегіз бала мектепке қажетті құрал-жабдықтармен қамтамасыз етілді. Ізгі іс ертең де жалғасын табады.
"Иманғали" орталық мешітінің баспасөз қызметі

Кеше Махамбет ауданына бас имам тағайындалды. «Исатай - Махамбет» аудандық мешітіне қызметке келген Иманғалиев Ержан Насихатұлын жергілікті жұртшылыққа Атырау қалалық «Құспан молла» мешітінің бас имамы Эммат Ғұмаров таныстырды.

Ислам дінін дәріптеу жолында қызмет етудің қайырлы амал екендігін айтқан ол, бас мүфти Ержан қажы Малғажыұлының бұйрығымен жаңа қызметке тағайындалып отырған Ержан Иманғалиев имамның жұмысына сәттілік тіледі.

Айта кетелік, Ержан Иманғалиев Жылыой ауданының тумасы. 2009-2013 жылдары Алматы қаласындағы Нұр-Мүбәрак египет-ислам университетінде білім алды. 2016 жылға дейін Жылыой мұсылмандар мешітінде наиб имам қызметін атқарды. Кейін исламтанушы мамандығы бойынша ғылым магистрі атанды.

«Иманғали» орталық мешітінің баспасөз-қызметі.