іslam-atyrau.kz/13 ақпан, 2020 жыл.  Алғашқы жұмыс сапарын Алматыдан бастаған ҚМДБ Төрағасы, Бас мүфти Наурызбай қажы Тағанұлы Діни басқарманың бұрынғы төрағасы, Нұр-Мүбарак университеті ректорының кеңесшісі Ержан қажы Малғажыұлымен арнайы кездесті.

Жүздесу барысында Діни басқарманың биылғы 30 жылдық мерейтойында атқарылатын игі шаралардың бірсыпырасы таныстырылды. Ержан қажы Малғажыұлы ойға алған жұмыстарға ризашылығын білдіріп, өзінің ағалық кеңесін қосты.

«Еліміздегі мұсылман жамағатының талабы күшті. Сондықтан имамдарымыздың білімі соған сай болу керек. Имамдарға қойылар міндет те – жоғары. Дінді насихаттау – елдік, ортақ жұмыс. Алайда бірінші орында бауырмалдық қасиет тұруы тиіс. «Жас келсе – іске» дейді. Өзіңе әрқашан да тілектеспін. Алла осы кезеңді дамытуға лайық деп таныпты. Ендігі қолға алар істерің табысты болсын» деді Ержан қажы Малғажыұлы.

Сондай-ақ Бас мүфтидің ұсынысымен құрылатын Ақсақалдар алқасы құрамына Ержан қажы да кіретінін мәлімдеді. Кездесу соңында алдағы уақытта Діни басқарма аясында атқарылар ортақ шаруаларға үлес қосатынын айтты.

Өз кезегінде Бас мүфти Наурызбай қажы Тағанұлы Ержан Малғажыұлының асыл дінімізге, оның ішінде мүфтиятқа сіңірген еңбегін ерекше атап өтіп, сый-құрмет ретінде иығына шапан жауып, Діни басқарманың естелік бұйымын табыстады.

  іslam-atyrau.kz/13 ақпан, 2020 жыл.  ҚМДБ Төрағасы, Бас мүфти Наурызбай қажы Тағанұлы Алматыға іссапар аясында өзінің ұлағатты ұстазы, Діни басқарманың тұңғыш тізгінін ұстаған Рәтбек қажы Нысанбайұлына арнайы барып сәлем берді.

Рәтбек қажы Нысанбайұлы шәкіртін ілтипатпен қарсы алды. Екеуара кездесу барысында тоқсаныншы жылдардағы еліміздегі Ислам мектебінің қайта қалыптасу кезеңі, жаңа мыңжылдықтағы өзгерістер мен бүгінгі бет бейнесі әңгімеге арқау болды.

«Ештеңе оңайлықпен келген жоқ. Тәуелсіз Қазақстанның әр жерінде жаңа мешіт ашумен қатар, елді діни сауаттандыру жұмыстары да қиынға соқты. Бірақ имамдарымыз сол бір ауыр жолдың азабын бірге көтерді. Өзіңді білім алып келген соң, шәкіртім деп қабылдап қаймағы бұзылмаған қалың қазақтың арасына жібердім. Артқан үмітті ақтадың. Енді міне, Алланың қалауымен биікке жеттің. Осы қызметте де абыройлы бол!» деп ағынан жарылған Рәтбек қажы Наурызбай қажы Тағанұлына ақ батасын берді.

Бас мүфти ұсынысымен Діни басқарма жанынан құрылатын Ақсақалдар алқасына Рәтбек қажы да мүше боп қосылатынын жеткізді.

Кездесу соңында ҚМДБ Төрағасы ұстазына құрметі үшін алғыс айтып, қазақтың дәстүріне сай сый-сияпат көрсетті. Рәтбек қажының иығына шапан жауып, Діни басқарманың 30 жылдығына орай дайындалған кәдесый тарту етті.

  іslam-atyrau.kz/13 ақпан, 2020 жыл. Алматыға арнайы келген Қазақстан мұсылмандары діни басқармасының төрағасы, Бас мүфти Наурызбай қажы Тағанұлы Р. Сүлейменов атындағы Шығыстану институтының директоры, белгілі ғалым Әбсаттар қажы Дербісәлімен кездесті.

Әбсаттар Бағысбайұлы Наурызбай қажы Тағанұлын жаңа қызметімен құттықтап, жұмысына сәттілік тіледі. Діни басқармада 10 жылдан аса қызмет атқарған бұрынғы мүфти жаңа мүфтиге бата беріп, ізгі ниетін жеткізді.

«Елге қызмет етуде аянбаңдар. Діни салаға өзіңдей білікті басшы, діндар азаматтың көмегі қашан да керек. Сондықтан өзіңе әрдайым тілектеспін» деді Әбсаттар қажы Дербісәлі.

Өз кезегінде Наурызбай қажы Тағанұлы: «Бізге бағыт-бағдар беріп, дін жолында үлгі болып, көрсеткен күш-жігер, ағалық ақылыңыз үшін алғыс айтамын» деді. Сондай-ақ Бас мүфти ұсынысымен Діни басқарма жанынан құрылатын Ақсақалдар алқасына мүшелікке өтуге Әбсаттар қажы қуана келісімін берді.

Кездесу соңында ҚМДБ Төрағасы Наурызбай қажы Тағанұлы Әбсаттар қажының иығына шапан жауып, Діни басқарманың 30 жылдығына орай жасалған кәде-сыйды тарту етті.

  іslam-atyrau.kz/13 ақпан, 2020 жыл. Бүгін Елордада Бас мүфти Наурызбай қажы Тағанұлы көрнекті мемлекет және қоғам қайраткері, белгілі түрколог- ғалым Мырзатай Жолдасбековпен сұхбаттасты.

Кездесуде мүфтият жанынан Ақсақалдар кеңесін құру, жастарды дәстүрлі құндылықтарға тәрбиелеу, Абайдың 175 жылдық мерейтойы аясында бірлескен шараларды жүзеге асыру, имамдардың білімі мен тәжірибесін арттыру сынды бірқатар мәселелер талқыланды.

Бас мүфтиді жаңа қызметімен құттықтаған Мырзатай Жолдасбеков: «Алла әрқашан абыройыңды арттырып, мерейіңді үстем етсін. Жаңа қызметіңде жақсылықтарға жете бер. Еліміздің еңсесі биік болғай. Дін қызметінде жүрген ұжымыңа, барша имамға Алланың берекетін тілеймін. Білімді болыңдар. Сол білімді халыққа жайыңдар. Халық аман, жұрт тыныш болсын» деген жүрекжарды лебізін жеткізді.

Абыз ақсақалға алғысын білдірген Бас мүфти Наурызбай қажы Тағанұлы ҚМДБ жанынан Ақсақалдар кеңесі ашылатынын тілге тиек етті.

«Сіз өмірде көргеніңіз бен түйгеніңіз көп қазыналы тұлғалардың бірісіз. Біз сіздің кеңесіңізді тыңдап, оны діни салада жүзеге асыруға әрқашан дайынбыз. Дін қызметкерлеріне ғибратты дәріс оқып берсеңіз деген тілегіміз бар. Сонымен қатар, ҚМДБ Ақсақалдар кеңесі жұмысына белсене араласып, ақсақалдық ақылыңыз бен кеңесіңізді айтып отырсаңыз. Алла сізге де күш-қуат берсін!» деді Бас мүфти Наурызбай қажы Тағанұлы.

Кездесу соңында ғалым өзінің «Кісілік келбеті», «Ойтолғау», «Ұлы дала әдебиеті» сынды 30-ға жуық кітабын Бас мүфтиге сыйға тартты. Өз кезегінде ҚМДБ Төрағасы да ақсақалға кәде-сый ұсынды.

 іslam-atyrau.kz/13 ақпан, 2020 жыл.   Атырау облыстық орталық «Иманғали» мешітінен бастама алған «Қаралы үйдегі ас мәзірі және жаназа рәсімдері» атты іс-шара аясында Жылыой аудандық мешітінде алқалы жиын өтті.

Жиынға Атырау қалалық Құспан молла  мешітінің бас имамы Эммат Ғұмаров, аудан бойынша қызмет атқарып жүрген имам-молдалар, ардагерлер кеңесінің мүшелері, қажылар қауымдастық төрағасы, беделді ақсақалдар және зиялы қауым өкілдері қатысты.

- Жаназа мәселесіне келгенде, әр өңірде әртүрлі рәсімдер орындалып жүргені белгілі. Жаназа намазы – пенденің дүниедегі өзгелерден талап етер соңғы ақысы. Жаназасын шығару мұсылмандар үшін парыз кифая. Өліге құрмет көрсету, арулап аттандыру – шариғат талап еткен іс. Қазіргі қоғам-дағы өзекті мәселені ескерген Қазақстан мұсылмандары діни басқармасы осы мәселелердің жөн-жосығын көрсетіп, нақтылы пікір, пәтуалы сөз жеткізуді жөн санады,- деді Эммат Ғұмаров.

Аудан ақсақалдары мәзірде көрсетілген әрбір мәселені мұқият зерттеп талқылады. Аудандық «Жылыой мұсылмандар» мешіті жергілікті БАҚ беттеріне жаназа және жерлеу рәсімдері бойынша түсіндірме жүргізу қажеттігін айтты. Ұсыныс ақсақалдар тарапынан қолдауын тапты. 

Осылайша, сауапты іс Жылыой жұртшылығына жол тартты.

Жиынға қатысушыларға «Жаназа және жерлеу рәсімдері» кітабы сыйға тартылды.